因為工人姐姐今日開始放大假返故鄉囉, 真係好難想像間屋會比兩隻小魔怪攪成點?
而我同爸爸又比佢兩個玩成點? 仲有梗係冇啖好食喇!!!
至於照顧家姐及細佬的重任暫時就交由婆婆及姨婆婆負責.
雖然姐姐冇咁早去機場, 但一大早八點正婆婆及姨婆婆已經飲完早茶, 仲打包埋雞包仔嚟接班, 佢地先同爸爸一齊送家姐返學, 同交帶老師婆婆今日及明日都嚟接家姐放學, 兩老返屋企時順路買埋餸.
今日真係呢 ...... 多事到呢 ...... 多野做到呢.....
第一件就係我最最唔鍾意做的野 ~~ briefing, 比人 breif 梗係唔 likely, 但 breif 人我都唔係咁鍾意. 我覺得咁大個人唔洗吓吓講到出口咁囉, 自己識自律及自覺. 但而家 d 年輕人唔識囉,
試用期都未過已經成日遲到, 兩個星期遲 4 日仲要遲過 9:30, 唔係幾近分鐘; 又成日掛住 msn, 仲要開到成個 screen 咁大, 慌死老細睇唔到咁; 仲有你係 receiption 嚟, 成日飛錯線; 又打錯哂 d 野; 仲有 ...... 點頂先.
第二件就係個 it 人係度整左成日電腦, 搞到我做唔到野, 佢走左至可以開工, 終於做到成 8 點到收工.
真係好担心兩隻小魔怪返轉間屋, 更担心佢地玩死兩個老人家 ........
去到屋企門口出奇地安靜, 完全冇打鬧聲. 一開門細佬即刻跑嚟歡迎我,
之後就返埋枱枱同家姐一齊畫畫......
呢個畫面同我想像中的地獄畫面好唔同, 地方又好乾淨整齊喎, 仲有三餸一湯等緊我, 有蘋果雪耳豬肉雞湯, 芽菜椰菜抄牛肉, 木耳蒸雞及薑蔥蒸撻沙魚 .......
嘩, 好懷念的媽媽靚湯及餸呀!!!
咪以為佢地掛住睇電視，查實佢地每人已經飲左２大碗湯
一路食一路傾，兩老話佢地好乖，冇發脾氣，好易湊喎．兩老仲襯佢地瞓晏覺的時間, 抺地地執屋 tim .... 真係唔好意思, 屋都幫我執埋
話時話, 兩隻魔怪又真係好似乖左, 起碼可以安安定定自己食飯, 冇發脾氣,
最重要係細佬冇成日黏住我, 可以自己玩, 等我食到餐舒舒服服的晚餐 ..... 親人湊真係好 d 喎.
其實, 冇工人的日子都唔係咁恐怖啫.
沒有留言:
張貼留言