甜甜酸酸 ♥ 開胃又潤喉 ♥ 柑桔蜜

年十六又是時候清走公司擺放的兩大盆年桔
同事清走前，都好醒目的剪下大大粒的柑桔

我呢個唔嘥野的師奶，當然好環保的拎番屋企整了好潤喉的柑桔蜜

 

賣相好靚呢 ... 有點似韓國的柚子蜜 ...
不過，自己整的健康好多的

之前都出過 post 教大家整柑桔果醬 ...
其實，果醬及柑桔蜜的做法是一樣的，不過我覺得個名靚 D 囉 !

今次唔用砂糖改用了冰糖 ... 咁就滋潤 D 喇 !!!

 

首先，將 400g 柑桔浸洗乾淨，再去核切絲

然後，將金桔絲及 150g 碎冰糖以中火煮至冰糖完全溶解 

加入 1 湯匙檸檬汁混和，即可入樽

柑桔含豐富果膠，很快已能煮出膠質
剛煮好還熱的果醬看似稀稀的，不要緊的 ... 待放涼時，會慢慢變得黏稠的

囡囡好捧場 ... 不只幫手整，一整好仲即刻幫手試味

 

用兩匙柑桔蜜加溫水即刻沖了杯潤喉的本桔蜜飲

由於無添加 (無任何防腐劑) 唔放得耐，要在 1 個月內食用

今次的柑桔就咁食較酸

加了冰糖用來煮柑桔蜜就甜甜酸酸的 ... 好好味

囡囡不只鍾意用嚟整柑桔特飲，仲會用嚟搽麵包

亦可以用嚟煮餸 ... 好似柑桔醬雞翼、柑桔醬抄雞柳

好快食哂的

** 以上分享是以我的口味、喜好及情況作出分享及感受，合用 / 一試與否請自行決定