apita shopping

約了婆婆在太古城食晚飯, 未夠鐘去左 Apita 的超級市場掃貨

以前覺得日資超級市場的貨品貴好多

 

但而家百物騰貴

分分鐘日本貨及外國貨仲平 D

好似日清的食油仲平過刀X牌幾元

最正就係試食, 行左一圏

食左米線, 腸仔, 牛扒, 薯片, 猴頭菇湯及果汁 ~~ 真係飽飽

喂, 推介下面食物比大家

黃色果包薯片 ~ 好特別呀! 有芥末的香味及蜜糖的甜味  ... 好好食

即食冷麵 ~ 麵條好似拉麵咁爽口彈牙 (唔知關唔關傻爸過左冷河事呢?)

個芝麻醬汁又好香, 唔太酸好開胃

樂富間 Apita 幾時開???

對面海好遠呀!!

滑滑腸粉早餐

送完家姐返學行過間新開的 "香港腸粉皇" 入去買份早餐返公司嘆

嘩 ... 好耐冇見的布拉腸粉，即叫即做

仲有好多選擇，梅菜腩肉腸、豬膶腸、鯇魚腸

我叫左好穏陣的叉燒腸及有 D 特別蔥花蝦米蛋腸，加多支凍豆漿

返到公司打開個盒見到黃金金加埋綠色的蔥花及橙色的蝦米 ... 好靚呀

布拉腸粉真係唔同 D ... 好食好多 ... 好滑呀!!!

叉燒腸普通左 D, 但滑滑的布拉腸粉加番分

lunch @紅茶館

成日行過都話入去試吓, 但次次都唔記得

上星期又同家姐講話下次去試

點知佢由星期四開始日日提我星期六放工記得去食晏

點敢唔記得喎

真係怕左呢個小管家 

cake set = cake + drink ~ $22 

lunch set = 湯 + 白汁龍脷柳配天使麵 + drink ~ $42

價錢比茶餐廳貴少少, 但坐得舒服及乾淨, 食物都 OK

家姐的新囡囡

新嚟的仙蒂公仔咪係新囡囡囉

細佬都唔執輸, 攞個公仔嚟玩及刷頭先

家姐的 Cinderella Doll

家姐真係好好記性

特登打電話提醒傻爸帶佢個仙蒂公仔返嚟

但傻爸今日好多野做, 要晚 D 才返, 叫家姐唔好等佢喎

正當家姐刷完牙準備上床之際, 傻爸就返嚟啦

仲帶埋家姐個仙蒂 tim ~~ 家姐終於等到佢個公主返番啦

但傻媽梗係唔比佢玩 ... 太夜...要瞓啦, 明朝先玩啦

再辛苦都抵

回家途中慣常打電話比家姐閒聊

以下係我地的對話內容

家姐 : 媽咪, 你今日咁夜收工?

傻媽 : 係呀! 今日好多野做呀

家姐 : 你個老闆咁曳, 比咁多野你做 ... 點解你唔做老闆?

吓, 比佢咁問, 差 D 接唔上, 傻媽 : 做老闆要好多錢, 我又冇錢

家姐 : 我以後買少 D 野, 細佬又買少 D, 比 $$ 你老闆, 叫佢又比你做老闆

 ... 我大個又賺多 D $$ 比你

唔理以後做到與否, 佢識咁講我已經好開心

心都甜哂

再辛苦都抵番哂

細佬的新車車

細佬好鍾意傻爸送的新車車

呢架 School bus 係佢咁多車車當中最大的

但家姐就有 D 唔開心

傻爸唔記得佢個仙蒂公仔

傻爸明日記得攞返嚟啦 ~~ 否則家姐實嬲死你

踩單車 @沙田交通安全公園

家姐好想踩單車

但而家可以踩單車的地方不多

以前屋苑平台都可以踩

但年頭出左通告基於安全理由禁止在屋苑範圍踩單車

有人唔理通告, 照樣帶小朋友係平台踩單車

但我唔想咁囉 ~~ 明知唔啱都做

傻爸好叻呀! 

終於諗到邊度可以踩單車又最安全

就係 沙田交通安全公園

家姐好開心呀!

因為可以好似傻爸咁係馬路駕車 

不過佢地唔係好識交通規則, 有時行錯線, 好彩冇對頭車咋

呢度仲有紅綠燈及班馬線 ~~ 如果有人扮途人過馬路仲好玩

踩到攰佢地仲識泊底架車休息

佢地就玩得開心

最辛苦就係我及傻爸呀

細佬仲未識自己踩 ~~ 大熱天要輪流推住佢四圍轉

Todai Lunch Buffet

今日又有人請食晏 ... 發達啦係 lunch buffet

好耐之前食過美麗廣場地庫的 Todai Dinner Buffet

好掛住佢的 阿拉斯加長蟹腳及甜品

 $148 一位都幾貴, 但請果個都話最緊要好食喎

哈 ... 哈 ... 今朝出奇地清閒, 11:45AM 就出發食 buffet

去到只係 12:15, 冇咩人, 但比左張樓梯底圓枱我地, 熱到死

壽司吧好多款, 好吸引

生蠔預左冇得食, 轉左青口

但冇蟹腳食 ... 好失望

好彩有個凍食的燒牛肉加沙律汁補番數 

甜品好睇唔好食

朱古力慕絲只得甜味冇朱古力味

豆腐奶凍又好奶

得朱古力雪糕及生果最靠得住

食吓食吓 .... 

食到 2:30PM 人地散場至打的番公司

飽到呢 ....

燈籠

今年冇特別買燈籠比兩隻魔怪

舊年買果個奧比斯燈籠仲好新, 入番電池新的一樣

但今年想買多個比細佬又唔見喎 ... 想做慈善都唔得 tim

係某個停車場見到掛住個公主燈籠好靚, 但周圍都買唔到

最後, 要麻煩姑媽係樓下間舖頭問人至買到最後兩個咋 ...

一個梗係買比家姐, 另一個白雪公主買比桐桐表姐的

 

點少得細佬果份, 米奇老鼠燈籠就最啱佢

把鬼西九龍海濱長廊中秋綵燈會

中秋節的氣氛愈來愈淡 

除了電視的月餅廣告及店舖的月餅推銷外

 其他中秋節的活動欠奉

上網搜尋到康樂及文化事務署舉辦的中秋綵燈會

我最想去睇大坑的舞火龍及維多利亞公園的綵燈會

應該是多個之中最大型及最精彩的

但又最多人的, 所以打消念頭

最後決定去西九龍海濱長廊的中秋綵燈會

因為西九龍是政府未來重點藝術發展區, 身為香港梗係要去支持

 

 

我地首先將車子泊在圓方停車場, 在千兩食完壽司, 再步行往西九海濱長廊

本來以為展場在圓方附近, 行十分鐘就到,  

但行了十多分鐘都唔覺周圍有類似的展場,  

沿途的指示不清楚, 途人又少, 真係好想放棄,  

但又唔甘心, 沿著海濱公園再行十多分鐘終於到達

但行了半個鐘換來的收穫竟然是來來去去幾款的紙紮綵燈 

大白兔, 飛機, 楊桃, 走馬燈, 不消十分鐘已經欣賞完畢

 

完全失望, 舊年高山劇場的綵燈會仲好睇, 地點又方便, 又熱鬧

Model 家姐

叫家姐企係度比我影相啫 ... 佢即刻擺幾個 Model post 比我影

飲完茶去左馬鞍山室內遊戲室玩

呢度有人數限制, 每節 25 分鐘, 人場前先排隊, 工作人員再派籌入場

職員仲會監場, 見有小朋友跑及做 D 危險動作, 會即時制止

咁呢度乾淨及安全過石硤尾個遊戲室, 可惜遠 D 囉!

玩得 25分 邊夠喉, 再在室外遊樂場玩多陣至得

中秋節

今日約好去表姐屋企玩及打邊爐

執埋兩架單車比佢地踩, 可惜酷熱指數極高, 寧願在屋內嘆冷氣, 冇踩倒

 

 

月餅

今年食的月餅都算多, 種類又多

除了傳統的蓮蓉月餅, 金華火腿月, 五仁月, 仲有朱古力月餅, 雪糕月餅及新出的螺旋藻月餅

工人姐姐好好笑 , 將月餅上面的金泊刮去至食, 佢以為果D係紙喎 ~~ 

我話係佢戴著條金鏈的足金嚟, 佢都唔係好信

如果你問我邊間的月餅最好食, 我一定答彩蝶軒的奶皇月餅

因為傻媽第一份工的大家姐每年中秋節一定會買幾盒返公司食

果時公司在金鐘, D 奶皇月餅從對面的太古廣場攞到返公司仲暖烘烘香噴噴

一打開蓋就分哂, 遲 D 都冇得食

對於年紀及閱歷少的傻媽, 呢個包裝精緻的月餅留下深刻的印象

就算離開了該公司, 每年的中秋都要買嚟食

仲有應承了桐桐表姐的雪糕月餅

幾受歡迎呀!!! 

係雪樻拎個月餅出嚟, 所有小朋友即刻坐埋位等食

細佬食完一件, 仲話 "唔夠, 唔夠"   "唔該, 再要"

中國服 @中秋綵燈會

今個學期第一個生日會兼中秋綵燈會, 著件中國服應節先

但傻爸話家姐似 "知客" 喎 

 

老師教家姐做的燈籠

傻媽又出現係家姐的作品喇!

我最初以為果個係家姐自畫

但佢話呢個係傻媽及傻媽  D 頭髮的黑色甩掉, 變左啡色  

... 好彩唔係變白色咋

學前教育 ... 雜誌有家姐仔呀

新的學期第一次送家姐返學校

家姐好開心一手拖住傻爸一手拖住傻媽笑笑口行返學校

校長仲話好耐冇見我, 問家姐點解咁耐冇見媽咪, 佢就扁嘴答 "媽咪要早D返工, 唔可以送我返學"

又叫我睇吓今期荷花出的 "學前教育" 雜誌, 裡面有介紹學校及有家姐張相

最初我以為得細細個頭的相, 要用放大鏡望果種呢

但傻爸食晏特登買左本雜誌番嚟睇, 仲 email 左果頁比我睇

估唔到咁大張喎 .... 佢地 5 個老友記霸左一頁呀

士多啤梨奶凍

食呢個士多啤梨奶涷嗰個竟然唔係士多啤梨怪家姐, 而係我
家姐就食緊青提子啫喱, 裡面有很多果肉.
之前食過牛奶味, 好好食~~ 好有奶味, 又唔太甜, 但幾貴.  上次係 JUSCO 見到呢個季節限定士多啤梨味, 個杯好 fancy 好靚, 食完又可以留返擺野

 

 

隻杯比工人姐姐當垃圾掉左

朱古力月餅

毎年中秋都收到林林總總的月餅

離不開蛋黃蓮蓉月呀, 金華火腿月呀 ... 好悶呀

今年難得有新野出現 .....

Mrs. Fields 的朱古力月餅 + 曲奇禮盒

 

份量小巧, 又幾好喎 ... 

好似傳統月餅咁, 比四個大大的月餅我都唔知食到幾時

 

一拎個朱古力月餅出嚟, 細佬已經自動自覺攞碗仔, 坐定定等傻媽分餅佢食

細佬仲食到成個嘴及身都係朱古力