Who am I ???

媽咪成日話我有運仔, 好多時抽獎都有奬, 仲要係大奬喎, 上年 BK 新年 gathering 抽到 3 奬 ~~ 一條媽咪想買好耐的 Baby Sling 揹帶, 上次 BK 一歲生日會仲抽到頭奬 ~ 造型攝影套餐一份.
由於係奬品的關係, 只可以在平日的非繁忙時間拍攝, 所以媽咪今日特登請假陪我去影相。 個套餐包 3 個造型及 28 張數碼相底，媽咪本來幫我楝左兔仔、王子及南瓜造型, 但件南瓜衫好重及厚, 令到我好唔舒服, 哥哥咪比件蜜蜂衫我換.
媽咪好醒目, 帶左我最鍾意食的星星餅嚟吸引我, 所以拍攝第一個兔仔造型的相係最靚的.  到王子及蜜蜂造型的時候, 星星餅已經比我食哂, 而我又攰又肚餓, 所以媽咪及攝影哥哥要用盡各種方法引我.
個半小時影左 85 張相, 雖然有啲相冇笑仲喊喊, 但媽咪話好得意, 所以加 $200 要哂全部相, 而我就成個散哂, 媽咪抱住一陣, 已經瞓著 lu.

 

 

 

 

 

病病病

近幾日的天氣時暖時涷, 好容易病病, 屋企兩個男仕都中招.

我流左兩日鼻水, 都好精神及精靈, 本來唔洗睇醫生,  但一大早連續打 4 個噴嚏, 流了兩條長長的綠色鼻涕, 吓死媽媽, 要即刻見醫生哥哥

爸爸就嚴重啲, 上星期尾感冒都未清, 今朝又發燒.  我地一齊見醫生哥哥, 醫生開左藥比我地, 但爸爸要打多枝針針, 醫生哥哥話會快 D 好.

Ballet

今日終於記得同家姐報名參加芭蕾舞試堂.
之前問極都話唔鍾意學, 但上星期尾無端端話同學仔A, B, C 都學緊, 又想學, 仲成日提我報名 tim.
唉!!!!  同學仔的影響力真大!

玻璃鞋

好開心, 買左對玻璃鞋, 好似公主對鞋咁有高高的鞋跟, 閃閃發光及有寶石.

Mega Box 童真天地 ~~ 垃圾桶好 cutie

復活節 ???

昨日家姐才話農曆十五係新年的最後一日, 今日就見屋企大堂收起新年裝飾, 改為復活節裝飾.
往年通常 4月頭才是復活節, 今年 3月21日咁早, 有冇人可以話我知點解????

 

元宵綵燈會 @高山劇場

農曆十五元宵佳節?? 人大左, 冇咁著意去慶祝節日, 但做做吓野, 諗起每年高山劇場都有元宵綵燈會, 應該帶家姐去見識吓中個情人節.
放工即刻趕返去接家姐, 之後搭巴士去高山劇院, 但我呢個傻媽媽遲左一個站落車, 個大冬瓜又唔肯行, 搞到要抱住個大冬瓜行多一大段冤枉路.  但真係諗唔到咁多人喎, 行到街口已經見到有警察維持秩序, 又人山人海, 仲見到 ATV 和鳳凰衛視係度採訪。
嘩 .... 原來 D 花燈好大的, 高過個人, 又多元化, 有熊貓、鹿、花、雞和奧運福娃。

 

 

 

   

   

  北京奧運的吉祥物 ~ 福娃花燈

 

 

好多大大小小熊貓及竹花燈座落在草坡上  

      

   流動厠所好乾淨

亂七八糟都要影

今個新年好凍, 得幾度咋, 天氣寒冷警報仲持續十幾日咁長, 每朝起床都見玻璃窗有一層水氣, 家姐好鐘意係上面畫畫, 細佬又有樣學樣畫埋一份
今日工人姐姐拉開家姐房的窗簾, 發現牆邊發 mo, 執開哂 d 雜物嚟抺, 家姐見到自己間房咁亂, 覺得好搞笑喎, 仲話要用相機影低, 我問佢咁亂有咩好影, 佢話 "亂七八糟都要影", 所以以下相片都係家姐的傑作.

 

  

 

 

 

 

遲來的開工利是

一大早, 老細佢地去車公廟拜神, 買左個很大很大的傳統風車及一個小巧的足金風車擺設, 同樣一個風車價值就大大唔同 .....
之後, 梗係派開工利是時間 ~~ 開左工幾日, 好彩順順利, 唔係實賴哂佢
呢兩年都用 Sworski 的利是封封開工利是, 都唔知老細係邊揾到咁多.  今年個利是封普通左啲, 但有 3 粒水晶, 多過舊年一粒.   不過, 我就覺得上年嗰個靚啲, 封面係 2 隻豬咀對咀及對眼係水晶嚟, 特別好多.
我連舊年封開工利是都未拆

 

 

初八~ lunch buffet

同事個朋友在酒店做, 食 buffet 有半價 (好抵, 每個人 $100 有找) , 成個 office 的同事 9 個人浩浩蕩蕩 12 時出發食 lunch.
D cake 好靚, 真係睇得又食得

初五 - 開工大吉

邊有人好似我咁早開工 ka
開工都唔緊要, 但開工利是又唔派住, 老細話初九至係吉日, 拜完神先派得開工利是 ...... 咁又叫我地開工 

小丑 BB ???

我今日係咪好似小丑???

好多哥哥姐姐都話我似喎 

好開心呀, 又可以周圍行周圍走
但媽咪好似好嬲咁
一定係我坐唔定
行唔穏又唔肯比媽咪拖住及扶住
她驚我跌親啦,

我又聽到佢話我咁曳
湊我仲辛苦過返工 ...... 敝

我要乖 D 至得
唔係媽咪會唔要我 ..... 但要我控制至得

 

年初三 ~ 機場 SkyPlaza

前日預訂了機場 4D 戲院的 "魔幻奇緣" 粵語版門票, 約定表姐佢地係機埸的翔天廊集合食午飯, 點知約都冇咁啱, 一入停車場就聽到保安員叫左個車牌號碼 ..... 咁熟?? 原來表姐架車就跟在我地後面.
今日天氣都幾好, 即刻攞部相機出來影吓相

 

  一去到梗係吃飽飽先, 好豐富的 foodcourt 午餐

呢度幾好行, 人少地方大, 店舖又大

 

Cinderella 電子手錶 ~~ $10 扭蛋, 好抵呀!!! (本來扭左隻橙色的 Aurora, 但錶帶反轉裝, 戴唔到, 個職員姐姐好好人, 即刻開部機比家姐楝左隻至愛 Cinderella)